Hai xa máis de 30 anos que foi erixida (así é como se di) a Parroquia do Cristo da Victoria no barrio de Coia. Dende os seus inicios, o que era unha pequena comunidade cristiá, quixo entender a súa fe unida ás ledicias e tristuras da veciñanza. Case todos éramos entón inmigrantes, xente das aldeas que apareceran en Vigo á quentura da industrialización.

A Parroquia do Cristo da Victoria é:

- Unha Comunidade, formada por persoas empeñadas en desenvolver valores comunitarios, no que todos temos cabida.

- Unha Comunidade Cristiá, na que se vive e educase segundo o modelo de vida de Xesús de Nazaret.

- Unha Comunidade Cristiá Popular, que fai súa a predilección de Xesús polos máis desfavorecidos, por iso non está no marco dunha igrexa tradicional conservadora, senón que se achega máis ao que se podería chamar «Igrexa dende e para os pobres».

- Unha Comunidade Cristiá Popular Comprometida, que non é allea aos problemas do seu entorno, senón que participa na animación do barrio no que vive e xera respostas asociativas que traballan pola xustiza e a promoción dos seus veciños.

Así nos organizamos. . .

A nosa organización pretende ser participativa e igualitaria, segundo o modelo dunha grande comunidade parroquial, composta por pequenas comunidades ou grupos. Hai multitude de nenos, mozos e adultos que se xuntan semanalmente para afondar na súa formación humana e cristiá.

Xunto a estas comunidades -estrutura básica da parroquia- existen tamén asociacións, movementos e plataformas, que procuran a atención á muller, á xuventude, á cultura, aos valores ecolóxicos, aos máis desfavorecidos do barrio.